Si tơl tuk!

Si tơl tuk yut maung tabiak bruk karei crih lahiw krưh gruk khik sa palak tangin saung bruk jiang ikak sa bariam.
Si tơl tuk yut maung tabiak rumư oh dauk nan sa hakauh saung danak gơp oh hu si dah thuk siam.
Si tơl tuk yut drưk maung bboh kasu cum oh nhjơp xơng panwơc pagwơn saung kaya alin karei saung panwơc pagwơn biak biai.
Si tơl tuk yut drưk maung bboh oh nhjơp bơl pađiak halei jang ghơh saung yut halar ciip jrơm tauk dalơm thaik hwơh glaung akauk sanung yuw mưta hadah saung mat glaung drơp urang praung oh nhjơp bruk par kham ranaih kataih.

Hu thei nau oh hanaih libuh sa dwa bbơng.Dwơn pataum wơk dom aria drơp drei saung yam nau mưng ni – di jalan cwah rwah pajơ drơp harei ni saung oh maung akauk dom hagait ka kar dak o drơp harei paguh. Drei brei, jwai damưn dung katung kaywa oh hu thei brei nau blauh damưn habien halei. Saung khik wơk dom hagait siam ghơh abih, drak pala bingu angauk tanưh bariam bblwak xơng nhjaiy maung cang thei ba mai.

Saung yut maung boh lac tuk drei tapa pajơ hu dom kađah kađaiy jatik si pabblwak hanuk mat ar. Tuk nan yut si twei hatai caung takrư dom kabha si tơl. Yut mưda hu tơk mưta maung tapa danưng babbơng katho pieh maung iơk dom taniak patuk, pieh ganơh lac yut dauk padiip biak biai saung bruk kati katơng drơp drei. Hadơr wơk brei ka hu tabiak ka bha hagait saung yut, yơ abih dom kabha siam ghơh abih dauk cang rauk pak anak.

Hadiip saung tanrak mưta blah asa drơp harei biruw dauk mai tơl, yut như!!!

(24.6.2009)

Chia sẻ cảm nhận của bạn